.gif)
काठमाडौँबाट पोखरा जाँदै गरेको बोलेरो जीप धादिङमा भारतीय ट्रकसँग ठोकिँदा एक यात्रुको मृत्यु भएको छ । धादिङ प्रहरीका अनुसार प्र ३–०१–०२३ च ६५८ नम्बरको गाडी शुक्रबार राति १२ बजेतिर पृथ्वी राजमार्गअन्तर्गत एक्लेफाँटमा यूपी ३२ टीएन ४१९८ नम्बरको भारतीय गाडीको पछाडिको भागमा ठोकिएको हो ।
दुर्घटनामा ललितपुरको बागमती गाउँपालिका–१ का ३४ वर्षीय थुलबाबु थिङको मृत्यु भएको जिल्ला प्रहरी कार्यालय धादिङका प्रवक्ता प्रहरी नायब उपरीक्षक (डीएसपी) सुवास हमालले जानकारी दिए । दुर्घटनामा गम्भीर घाइते उनलाई उपचारका लागि काठमाडौँको ट्रमा सेन्टर पठाइएको थियो । तर उपचारका क्रममा शनिबार बिहान २ बजेतिर उनको मृत्यु भएको डिएसपी हमालले जानकारी दिए ।
बोलेरो गाडीमा रहेका चालकसहित अन्य ५ जना भने सकुशल रहेको प्रहरीले जनाएको छ । दुर्घटनापछि भारतीय ट्रकलाई धादिङको बेनीघाट रोराङ गाउँपालिका–९ स्थित पृथ्वी लोकमार्गको जोगिमाराबाट नियन्त्रणमा लिइएको छ । यसका चालक भारत उत्तर प्रदेश मोहमदपुर खला बस्ने ४० वर्षीय कमलेशकुमार यादवलाई पनि प्रहरीले पक्राउ गरेको छ ।
थप अनुसन्धानका लागि उनलाई इलाका प्रहरी कार्यालय गजुरीमा राखिएको धादिङ प्रहरीका डीएसपी हमालले जानकारी दिए । उनका अनुसार बोलेरो गाडी चालकलाई पनि प्रहरीले नियन्त्रणमा लिएको छ ।
.jpeg)
.gif)
